Chor mischedau Suraua

Gemischter Chor Suraua


Contact

Per plascher contactar l'uniun sut chor@remove-this.uniuns-suraua.ch



Video

Historia

Il chor mischedau Suraua ei vegnius fundaus igl onn 1974 dalla giuventetgna da Suraua. Gia dapi 6 onns cantavan ins ensemen a caschun da diversas occasiuns. Ruedi Collenberg ei staus in dils iniziants dil chor ed ei vegnius eligius sco emprem dirigent. Igl emprem concert ha il chor astgau dar igl onn 1978 a caschun dil giubileum da 40 onns chor viril Lumnezia. Dapi lu han ils cantadurs e las cantaduras concertau regularmein, savens ensemen cun auters chors ni auters acts musicals.

In concert tut aparti ha giu liug a Cuschnaus igl onn 1987: Ensemen cun il cabaret Rotstift ha il chor concertau en favur dallas scolettas lumnezianas. In onn pli tard ei il chor mischedau vegnius envidaus a Turitg el studio da televisiun per cantar duront l’emissiun «Fyrabig», quei sut il motto «Schweizer helfen Schweizer».

Il Chor mischedau da Suraua en l'emissiun «Fyraabig» 16-12-1988

Sco in dils puncts culminonts en la historia dall’uniun vala segiramein il premi da cultura dalla CRR ch’ei vegnius surdaus al chor igl onn 2002.

Il chor mischedau Suraua ha gia priu part a numerusas fiastas da cant districtualas e cantunalas, adina cun grond success. Gion Giusep Derungs, il cumponist-casa dil chor mischedau, ha stediamein mess a disposiziun cumposiziuns per talas occasiuns. Igl onn 2000 han cantaduras e cantadurs per l’emprema ga priu part ad ina fiasta da cant federala. A St-Maurice/Monthey han els presentau treis canzuns romontschas e recaltgau persuenter bein enqualas arbagias.


Il chor mischedau igl onn 2015