Uniun da giuventetgna Suraua

Jungmannschaft Suraua


Contact

Per plascher contactar l'uniun sut giuventetgna@remove-this.uniuns-suraua.ch

Historia

Igl atun 1971 elegian las giuventetgnas dad Uors e Surcasti ensemen cun sur Giusep Cathomas 4 persunas per meglierar la collaboraziun dallas uniuns. Enstagl da statutas vegnan entgins puncts impurtonts fixai per la veta da cumminonza. Il tgamun dall’uniun da giuventetgna Surcati/Uors consisteva lu ord in president general, dus responsabels (1 per vischnaunca), in cassier ed in actuar. L’incumpensa dils responsabels locals era da mantener ils usits da mintga vischnaunca sco tochen dacheu. Expensas per occasiuns locals vegnevan finanziai ord la cassa generala. Ils 9 da schaner 1974 ha la cumpignia envidau l’emprema gada alla sera famigliara communabla. Sin proposta da sur Giusep Cathomas ha l’uniun da giuventetgna Uors/Surcasti lu era arranschau in sault per gidar da pagar ils cuosts da renovaziun dalla caplutta S. Carli ad Uors.

A caschun dalla radunonza generala dils 9 d’october 1987 vegn tematisau in’eventuala fusiun cun l’uniun da giuventetgna da Tersnaus. Las statutas existevan gia. El decuors dalla medema sera ha il president dall’uniun da Tersnaus purtau la novitad ch’ils da Tersnaus seigien buca propmpts da seligiar e purtar sulettamein 3 commembers ch’ein tuttina buca prompts da surprender in uffeci ni l’auter. Aschia duei l’uniun da giuventetgna da Tersnaus pli bugen sesligiar. Era a Surcasti/Uors vegneva discussiunau davart igl avegnir dall’uniun. Il diember da commembers era numnadamein sereducius marcantamein. Denter auter era vegniu decidiu da dar ina summa per la nov’orgla da S. Luregn priu il  cass che l’uniun vegness sligiada. En ina brev duei plinavon vegnir retschercau igl interess per l’uniun da giuventetgna. Pli tard han ins saviu beneventar 14 novs commembers aschia che l’uniun ha saviu exister vinavon.

Igl 1. da november 1975 vegn proponiu e decidiu da far ina sera da tscheiver ensemen cun las uniuns da Camuns e Tersnaus. Naven da lu duei il contact cun Camuns e Tersnaus vegnir pli stretgs seigi quei cun ulteriuras seras da tscheiver ni cun viadis.

Alla radunonza generala dils 13 d’otober 1979 ha la giuventetgna Surcasti/Uors tractau denter auter il reglament da matgs e tschupials. Quel prevedeva denter auter la collaboraziun denter giuvnas e giuvens da Surcasti ed Uors per far tschupials, independentamein per tgei vischnaunca. Alla radunonza generala 1979 vegn plinavon decidiu da far sontgaclau communabel denter Uors, Surcasti, Tersnaus e Camuns. Legreivlamein han ins quei onn era saviu prender si 39 commembras e commembers novs ell’uniun da giuventetgna Surcasti/Uors.

Alla radunonza dils 4 da zercladur 1994 s’occupescha la tractanda 5 cun la reuniun ad in’uniun da giuventetgna Suraua. Ils 22 d’october 1994 vala sinaquei sco datum da fundaziun dall’uniun da giuventetgna Suraua. Damai che Camuns possedeva lu era negin’uniun da giuventetgna pli, fan daniev 6 commembers da Camuns e Tersnaus part all’uniun.