Societad da musica Suraua

Musikgesellschaft Suraua


Contact

Per plascher contactar l'uniun sut musica@remove-this.uniuns-suraua.ch

Nos dirigents

  • 1978 - 1999 Simon Derungs
  • 1999 - 2004 Silvio Derungs
  • 2004 - 2006 Alfons Blumenthal
  • 2006 - 2009 Simon Derungs
  • 2009 - 2010 Gaudenz Cathomen
  • 2010 - 2011 Simon Derungs, Silvio Derungs, Andrea Dermon
  • 2011 - 2013 Simon Derungs
  • 2013 - 2018 Claudia Derungs
  • 2018 - Ursin Derungs

Nos presidents

  • 1978 - 1987 Pius Derungs
  • 1987 - 1996 Robert Albin
  • 1996 - 2003 Marcus Arpagaus
  • 2003 - 2006 Simon Derungs
  • 2006 - 2009 Silvio Derungs
  • 2009 - 2014 Martina Deplazes
  • 2014 - Gian Carlo Albin
La societad da musica a caschun dalla fiasta cantunala da musica a Flem igl onn 1983

Fiastas cantunalas

  • 1983 Flem
  • 1987 S. Murezi
  • 1992 Favugn
  • 1997 Tavau

Fiastas districtualas

  • 1985 Breil
  • 1989 Rabius
  • 1995 Val S. Pieder
  • 2000 Sedrun
  • 2010 Trun

Fiasta da musica districtuala 2010 a Trun

Historia

Gia igl onn 1977 sunavan entgins giuvens a Suraua in instrument da flad. Per far ina surpresa a caschun dalla sera famigliara igl unviern 1977/78 sepresentan ils suandonts musicants cun in per pintgas producziuns: Martin Antoni Derungs, Balzer Derungs, Anton Derungs, Giusep Casanova, Luregn Giusep Blumenthal, Giachen Martin Arpagaus, Maurus Arpagaus e Ruedi Collenberg.

Dallas musicas da Glion, Vignogn e Lumbrein havevan ins obteniu in per instruments vegls e sut la direcziun da Simon Derungs, musicant activ dalla musica dil marcau da Glion dapi 1972, eis ei reussiu da far ils emprems pass musicals. Sto esser che las producziuns a caschun dalla sera famigliara 1978 han plaschiu alla populaziun da Suraua. Suenter paucs dis han plirs giuvens mussau lur interess enviers la musica da stuors a Suraua.

Pius Derungs, igl emprem elegiu president da nossa musica, ha pigliau a mauns ed envidau tuts interessai da s'annunziar e gia la fin digl unviern 1978 han ins entschiet culs emprems exercezis. Ils 19 da matg 1978 ha giu liug ad Uors la radunonza da fundaziun.

Fundaturs dalla societad da musica Suraua:

Simon Derungs, Pius Derungs, Maurus Arpagaus, Toni Capaul, Luregn G. Blumenthal, Giusep Casanova, Silvio Derungs, Anton Derungs, Balzer Derungs, Marcel Derungs, Giachen M. Arpagaus, Elmar Deflorin, Albert Arpagaus, Egmont Heisch, Ruedi Collenberg, Luregn G. Sgier, Martin A. Derungs, Simon Derungs (Laax).

Ils fundaturs ils 19 da matg 1978

A caschun dalla rogaziun federala il settember 1978 suna la nova formaziun l'emprema gada. Gia tier l'emprema radunonza generala dils 24 d'uost 1979 sa la musica prender si 15 commembers novs. Gronds ei era il diember da commembers passivs che sustegnan la musica finanzialmein.

Naven dad ussa embellescha la societad da musica diversas occasiuns profanas e sacralas dallas vischnauncas sco per exempel seras famigliaras, perdanonzas en tuttas pleivs, fiasta naziunala eav.

Tier la tschentada da cumin 1981 ei la musica da Suraua l'emprema ga musica ufficiala. Ils 15 da matg 1982 ha liug a Suraua igl emprem concert ensemen cun il chor mischedau da Suraua. Igl onn 1984 dat la musica in lteriur concert cun il chor mischedau Suraua. Igl onn 1985 suonda in concert sulettamein dalla musica Suraua e la primavera 1986 in tal cun la scola primara da Suraua. Dapi igl onn 1987 concertescha la musica regularmein duas gadas ad onn.

La societad da musica igl onn 2004 a Mustér

Igl 1. da fenadur 1984 astga la musica festivar l'inauguraziun dalla bandiera nova. Ina tala fiasta da musica haveva ei aunc mai dau a Suraua. Cun la partizipaziun dallas musicas Glion, Vrin, Lumbrein, Vignogn e Val ed ensemen cun la populaziun da Suraua havein festivau ina grondiusa fiasta. Sponsurada ei la bandiera vegnida dalla madretscha Els Pfefferle da Flem e dil padrin Luregn Derungs oriuds da Suraua. A caschun dalla 21avla fiasta da musica cantunala 1983 a Flem era curdau si alla dunna Pfefferle che nossa musica marschava senza bandiera, quei che ha motivau ella da sustener e finanziar ina tala.

Igl onn 1982 ei la societad da musica Suraua sedecidida da cumprar uniformas. La fabrica da ponn e vestgadira a Trun ha survegniu l'incarica da presentar differentas uniformas e la finala furnir quellas. A caschun dalla fiasta da musica cantunala a Flem igl onn 1983 spresenta la musica l'emprema gada en uniforma. Il tschiep blau e las caultschas grischas cun gravatta e capiala leutier ein aunc oz en fucziun. Cumpletada vegn l'uniforma igl onn 2000 cun in libroc e tschitta.

Il giubileum da 30 onns ha la societad da musica Suraua festivau ina fin d'jamna igl onn 2008 cun ina gronda fiasta ed ina instrumentaziun nova.

La societad da musica a caschun dalla fiasta da musica cantunala a Tavau 1997