L’uniun da dunnas Suraua ei vegnida fundada ils 8 da zercladur 2005 entras las presidentas dallas anteriuras uniuns da dunnas Camuns, Surcasti, Tersnaus ed Uors. Entochen lu haveva mintga fracziun da Suraua in’atgna uniun da dunnas.
Naven dalla fundaziun igl onn 2005 entochen igl onn 2009 ha Irena Derungs presidiau l’uniun. Ils onns 2009 entochen 2011 ei l’uniun da dunnas Suraua vegnida menada ensemen dallas commembras Brigitte Blumenthal, Sereina Casanova, Fabiana Derungs, Carmen Jakob ed Elisabeth Sgier.
Demai ch’igl interess era tschessaus ei l’uniun buca stada activa ils onns 2011 entochen 2013. Igl onn 2013 ha Brigitte Blumenthal surpriu il presidi e l’entira suprastonza ha saviu vegnir occupada.
La finamira dall’uniun da dunnas Suraua ei surtut da promover la cumpignia denter las commembras mo era denter l’entira populaziun. Aschia vegn organisau mintg’onn diversas sentupadas sco per exempel in suentermiezdi per las senioras ed il seniors, stiva da cafè per giuven e vegl, ina grillada giu Mulin, sco era in Rorate il december cun porscher silsuenter in solver communabel. In punct culminont ei era mintg’onn la tscheina per las commembras nua che il star da cumpignia stat el center. L’uniun da dunnas Suraua segida era tier l’organisaziun d’occurrenzas pli grondas a Suraua. Plinavon vegn organisau tenor giavisch ed interess divers cuors e viadis. Era per l’organisaziun digl usit dil cantar dils sogns retgs a Suraua entras ils scolars ei l’uniun da dunnas responsabla e cooperescha cun la scola Lumnezia e las ulteriuras uniuns da dunnas Lumnezianas.
Actualmein dumbra l’uniun da dunnas Suraua 33 commembras.